ફ્રાન્સ ૧૧ ઓગસ્ટથી અનિચ્છનીય ટેલિમાર્કેટિંગ કોલ્સ પર પ્રતિબંધ મૂકશે
શું તમને માર્કેટિંગ એટલે કે વસ્તુ જાહેરાતના ફોન આવે છે? શું તમે પૂર્વ મંજૂરી વગર આવતા આ પ્રકારના ફોનથી કંટાળી ગયા છો? તો તમારા માટે તો નહીં પણ ફ્રાન્સના લોકો માટે સરકાર કાયદો લાવી રહી છે કે, પૂર્વ મંજૂરી વગર જો ટેલેમાર્કેટિંગના ફોન આવશે તો દંડ થશે.
આ કાયદો ૧૧ ઓગસ્ટથી લાગુ પડશે. નિર્ણય ૧૧ ગ્રાહક સંસ્થાઓની સંયુક્ત માંગ બાદ ફ્રેન્ચ સંસદે મંજૂર કરેલા કાયદા હેઠળ લેવામાં આવ્યો છે. અત્યાર સુધી કેટલીક શરતો સાથે માર્કેટિંગ કૉલ્સની મંજૂરી હતી, પરંતુ નવા નિયમનો મુખ્ય હેતુ લોકોને વારંવાર આવતા અનિચ્છનીય અને પરેશાન કરનારા ફોનથી સુરક્ષિત કરવાનો છે.
નવા કાયદા હેઠળ વ્યક્તિ કે કંપની જો ગ્રાહકની મંજૂરી વિના માર્કેટિંગ ફોન કરશે તો તેના પર દંડ થઈ શકે છે. આવા અનધિકૃત ફોનની ફરિયાદ કરવા માટે જાહેર વેબસાઇટની વ્યવસ્થા પણ કરવામાં આવી છે, જેથી ગ્રાહકો નિયમનો ભંગ કરનારાઓની જાણ કરી શકે. આ પગલાને ફ્રાન્સમાં ગ્રાહક અધિકારોને મજબૂત કરવા અને ટેલિમાર્કેટિંગમાં વધુ કડક નિયંત્રણ લાવવાના મહત્વપૂર્ણ પ્રયાસ તરીકે જોવામાં આવે છે.